بــدع وليدالمصري مرسل للشاعر محمد مســاعد
الجيــل الصاعد
يا الله ادعيك يامنشي طعوز السحايب=تغفر الذنب تغمرني بفيض الاجابه
اعف عني وجنبني شرور المصايب=وارشد العقل يامنان مسلك صوابه
يامسافر على الدهما كحيل الحواجب =بارق السير ذي تنجيك وقت الحرابه
وجهتك سانيك بالخط لاكنت راكب =صهوة الخيل تتعدى ضواحي رصابه
تعبر البر ذي مافيه تلقى متاعب=سفح صنعاء على الوديان فرقع ضبابه
توصل العاصمه آزال حيث الكتايب=رابطه في تخوم الارض مأوى رحابه
حاميه شعبنا المغوار وقت الزوايب=درعنا الواقي المعروف فيه الصلابه
باتصل عند اخو خالد حزام الحرايب=ذي للاصحاب طول الدهر مفتوح بابه
مرجع العرف ساس العز في كل واجب =ضيغم الغاب ذي سيطر على كل غابه
بايحييك يامرسول من قلب راغب=وانت قله قد المصري بعث لك كتابه
قال اخوراجي البداع شفت العجايب =في زمان ارتقى بالشكل معضم شبابه
اه ياحسرتي من جيلنا ذي مواكب=موضه العصر والافكار لاقت إصابه
اللحى لاتجد والوجه من دون شارب=والحواجب تٌقص والسلس داخل رقابه
ضغط ملبوس واصبح منضر الشاب عايب=والحلق في يده والثدي يشتي حلابه
وان مشى مثلما ربات حٌسن الكواعب=ضحكته واصله مايرغب الاالدعابه
ليش جيل اليمن ياقهري اليوم خارب=منظر البعض ياللعار سبب كآبه
اهمل الدين والعادات وايش السبايب=هل من الجيل من يعقل وراجع حسابه
العدو في ارضي دولة العٌرب غاصب=دمر اقطار في الساحه وكشر نيابه
والعرب دمهم يٌسفك وقالو مشاغب=آه من وضع صار الحق جٌنده غلابه
كم تحدي وكم اخطار ياجيل غايب=عنه الوعي لكن صحوته للربابه
وايش باقول لن القلب قد صار لاغب=يكفي الشرح لاسلطه ولاعد رقابه
فسر القول ياعزي بموجب وسالب=اصبح الجيل بالموضه رتايل عصابه
والف صلو على المختار ما المزن ساكب=من يحب النبي صلى ويكسب ثوابه
جــواب الشــاعر القدير محمد مســاعد
يالله ادعيك يا خالق جميع الكواكب=يامن الخلق تترجا وتطلب ثوابه
اغفر الذنب عبدك جاك يالله تايب=انت يامن تجيب العبد وقت الطلابه
بعد يا هاجسي ترحيب من قلب راغب=بالرسول المقنع ذي نزل من ركابه
ذي قطع رحلته واجتاز كل المصاعب=وصل اقوال أخو راجي ووصل خطابه
من شوامخ نقم باقول له يا مراحب=ما دكم راعده والسيل يسكب سكابه
ليث لاقد هجم يهجم بحد المخالب=يقتل الخصم ويقطع وينهش بنابه
له في الشعر مذهب من حسين المذاهب=كل من يسمع اقواله وقف واقتدابه
من عنوس اسعد المصري من اعلا المراتب=وانتقل لا بلاد اعماد روس الشعابه
حل فيها واسس حصن بالعز لاهب=نسل الاجياد ذي كل القبايل تهابه
بعد يامرسلي قم شل ردي وحاسب=واجزع الخط ساني مانريد الحنابه
با تصل عند بيت الطيب وابن الاطايب =مكرم الضيف لا قد جاه ضيف اعتنابه
اهده العطرذي فاخر من اغلى المضارب=رش داره ومطراحه ورشرش ثيابه
والتحيات لا تنسى بها اعز صاحب=قله البدع قد جانا وهذا جوابه
بواسامه يقول الوقت هذا غرايب=مثلما قال اخوراجي فكله غرابه
الف حسره على جيل اليمن صار سايب=يوم تشبه بطينه غير طينة ترابه
بدلو باللحى زنار بالوجه حانب=والشوارب بتنتف نتف والراس طابه
بدلوا بالجنابي والنصلّ والمقاطب=جنز مظغوط والعوره تُرى من جيابه
وان مشى صدق يتمايل على كل جانب=مثلما البنت ذي تسحب خطاها سحابه
لبسه اصبح مشابه للنساء او مقارب=ما عد الناقص الا البالطو والحجابه
طول وقته يضلي في الشوارع مراقب=وان رائ بنت في الشارع تسيّل لعابه
نسيوا ان اليمن في قمة العز ضارب=والعروبه اساسه من زمان الصحابه
جيل من هذه الاشكال هو جيل خايب=شوهو باليمن ذي ما يساوو ذبابه
جابو افكار غربيه صنعها الاجانب=لاجل يمحوا تواريخ العرب وانتسابه
شوف وضع العرب في موطن العُرب قاطب=وضع مقلوب ياخوا راجي اصبح قُلابه
كل موطن من اوطان العرب صار حانب=من زرع شر يحصد شر وقت الصرابه
لا تقلي ولا اقلك قد الراس شايب=لو نويت اشرح الموضوع كم يا كتابه
من تساهل بدين الله يلقى العواقب=هي عواقب وخيمه يوم يلقى عقابه
ذا جوابي وتفسيري لمن جاء معاتب=صح ما قال والتفسير ايّد عتابه
والصلاه تبلغ المختار سيد الحبايب=هادي الخلق سعده من مشى واقتدابه
ليست هناك تعليقات:
إرسال تعليق