بدع الشاعر المعروف بورعد بن قصيله مرسل لوليد المصري ((1))
ابو رعد قال يارب يا منصف الضعيف = ويا ناصر المظلوم عند المناصفه
سألتك بحق النور في دينك الحنيف = تخارج جميع الناس من كل لاهفه
وازكى صلاتي تبلغ الطاهر العفيف = محمد واله والصحاب المئآلفه
ومن بعد يالهاجس من الماجل النظيف = تسقّى لي الاقوال واملي مغارفه
وسجل قصيدت بدع من قولك الحصيف = ورسل بها لاهل الوفا والمكاتفه
إلى عند ابو راكان والشاعر المخيف = اذي له كثير اسرار رغم المعارفه
برغم انّه الحساس والذوق واللطيف = ودايم يشد الناس له بالملاطفه
فياليت شعري ما ورا ذلك القنيف = هل الخير والبشرا أو ابشِر بعاصفه
ولكنّ أباقوّي فؤادي وباستضيف = وباشوف وآنقب عن ايّت مخالفه
فلا بد له من يوم يسقط من الصُّفيف = وتستلقفه يدي رضا او محالفه
ولا بد ما اهزه بصاروخي العنيف = وبالبرجنيف اقصف وقوات ناسفه
عسا ربما يصحا من النوم لا يعيف = يبطل خموله والكسل والمناهفه
وبابارزه بالسيف والمرهف الرهيف = وبالقوس والانبال باعطيه سالفه
لحتى يرى الجمهور من مننا الحريف = ومن مننا له حق يفتح ملاقفه
نشئنا سوا واليوم يشتي يقع عريف = ويدخل مع العرّاف بحر الفلاسفه
رأيتك تجاملهم كانك لهم وصيف = كأنك موقع رقم باسم المضارفه
وتضحك مع الشعّار حمّيك يا ضريف = هل الخوف هزك قول ماانت خايفه
إذا كنت خايف قل بأن اسمك الأليف = وإن المكينه ذي معك شبه تالفه
وعند اعترافك بانقل روح ياأنيف = فما بيننا مقعد لذي هم انايفه
أذي يعشقون الزنط والمقعد النضيف = وذي عندهم اجواف ليّن وراهفه
وذي يكرهون الحيد والخبت والعجيف = كأني بهم رهبان والا اساقفه
وليش الدلع يا ذاك عاد انت باتجيف = وباتشتبج من كل دوده وزاحفه
فعجل بها من قبل تبقا بها اسيف = وخوض الحرك فالعمر ايام آزفه
أنا اشتيك تتحرك وتكرف بها كريف = تدمّ السما واقوال شعرك زخارفه
وتبقا ملك للشعر في شامخ الكِفِيف = محصّن بحصن الجان من كل زاهفه
وإلاّ فلي وقعت واصطف في الصفيف = وفي صف جندي كن عريف العرايفه
وكن طوع امري نفّذه مثلما الكفيف = ولبّي ندايا قبل يأتيك هاتفه
وحاذر من التخريب في الشامخ المنيف = ومن كثرة التنقيب في كل طايفه
فما عاد بايقطع في الصبه العطيف = ومنذا يهز اكتاف صمّا مراصفه
وعد باخبرك عن حال امة بني جنيف = واوسلو وشرم الشيخ واهل المواهفه
في القدس شفت الارض زادت من الرعيف = تلاقت دماها بالدماء الموالفه
فلسطين وابناها بالاحجار والوِضيف = وشارون بيزاغف رصاصه مزاغفه
وسوداننا منفي في ارضه كما الهطيف = ومحروم من خيرات حاضر وآنفه
وصومال يشكي قلّة الماء والرغيف = وعد به من العربان عمره مداهفه
وبغداد يا ويحي ويالهفها لهيف = ذبحها ولدها واهلها شبه شايفه
فذلت بلاد العُرْب للحلف والحليف = وما فادها عهد العدا والمحالفه
وفي اخر الاقوال بالفّ لك لفيف = بباقه من الازهار خاصّه موالفه
وارجوك تعذرني على بدعي العنيف = فلا بد للاموات هزات راجفه
وبالختم باصلي على احمد الشريف = شفيعي وكل الناس يوم المكاشفه
الجواب من وليد المصري
لواءإب والبيضاومارب مع الصليف= وصنعاءاليمن وابين وشبوه وخارفه
ترحب بشاعرقلب اخو قيس مستضيف =سموه لاخلاقه وقوة مواصفه
تراحيب ما الراعد تزرجم في الخريف=وماسال سيل الحيدمن كل شانفه
رعودي بوارق تعصف المنطقه عصيف= ونيران بركاني حمم كل قاذفه
ولااعرف خمول الجسم او قلب يستخيف=ولااهتاب لايتها سمينه وعاجفه
وفي قبضتيي شرمه من النامر الخفيف=سلاح الحرايب لادنت كل طارفه
ومحلا الصدف يوم جاءيبارزني الحليف=ويافرصة الرامي بهذا المصادفه
طلبني يبارزني على طرفة الرصيف=وقوسه ورمحه والحدايد مراصفه
خلط بين صاروخه وسيفه مع العطيف=وماضي وحاضر كيف يمكن يرادفه
تجاهل حقيقه يعلموهابكل ريف=وبندر وكل الناس بالارض عارفه
بان الفتىالمصري اذاقدنوىالمكيف=يخلي عيون الند بالدمع ذارفه
مكيفه على مكريب ينسف بهانسيف=وامامه جميع القوم تصطف واقفه
فياويل من ودف يقع في يدي صعيف=يلاقي هزيمه منتهيه وناشفه
وابورعد قد ودف برغم انه الرديف=لخو قيس والصاحب وانا دوم نايفه
ومن قدتحداني له اليوم ما استعيف=ويرحب على حارق وخارق وكاشفه
وانا مستعد ازويه في زوةالسقيف=ومن قام يتعنوط انا الان قاصفه
ومن فكراني تهت باحدث لهالنزيف=براسه لان لايملك افكار هادفه
وللكبروالتيهه انا دائما معيف=ولاحب قول الزيف او كل زايفه
ولاا عرف اجامل لا ولا منطقي ذليف=ولاحب قول الشعرلاهي مذالفه
وجاهز ومتجهزكما الحيف ذي يحيف=وصوت الوتر لارن اخوقيس عازفه
واصادق جميع الناس واعتاز للعفيف=واصاحب جماعه للتهاريج عايفه
فمن قد مشى مغتر قد فاكره سخيف=وافكاره الكبرى نتيجه مخاشفه
وعن ماذكرته عن وطا القصف والنديف=بأمه ضعيفه حولها الغرب عاكفه
اسف يااسف عن حالنا المؤسف الحفيف=باخطار مزروعةعلى كل شارفه
تمزق فوادي من قوى العسف والعسيف=سيول الدما ياذاك فيالارض جارفه
واصبح وطنا يفقد ارضه ولا يضيف=وماقدتبقى ناصفه رهن ناصفه
مواقف عصيبه انحلت جسمي النحيف=وقاداتنا الابطال صارو صيارفه
واصلي على المختار ماحن بالخريف= رواعد وما القاري يرتل مصاحفه
ليست هناك تعليقات:
إرسال تعليق